یونین پبلک سروس کمیشن کے نتائج کا اعلان گذشتہ روز کیا گیا۔ جس میں تقریبا ایک ہزار طلبہ نے کامیابی حاصل کی ان میں 50 مسلم طلبہ و طالبات بھی شامل ہیں۔ انہیں میں سے ریاست اترپردیش کے گورکھپور کی نوشین نے نواں رینک حاصل کیا ہے۔
حیدرآباد: یونین پبلک سروس کمیشن کے امتحان 2023 میں 50 مسلم طلبہ نے کامیابی حاصل کی ہے۔ جو ایک خوش آئند بات ہے۔ گورکھپور کے ایک علاقے کی رہنے والی نوشین نے یو پی ایس سی 2023 میں نواں رینک حاصل کیا ہے۔ نوشین کو یہ کامیابی چوتھی کوشش میں ملی ہے۔ نوشین نے اس کے لیے پانچ سال تک سخت محنت کی ہے۔ سنہ 2019 سے وہ لگاتار 3 سال پرائمری امتحان پاس کرتی رہی، لیکن مین امتحان میں کامیابی نہیں ملی۔ پھر بھی وہ مایوس نہیں ہوئی اور لگاتار کوشش جاری رکھی۔
نوشین نے کہا کہ ان کی کامیابی میں پورے خاندان کا حصہ ہے۔ وہ تین بہن بھائیوں میں سب سے چھوٹی ہے۔ والد عبدالقیوم گورکھپور آل انڈیا ریڈیو میں انجینئر ہیں، والدہ زیبا خاتون گھریلو خاتون ہیں اور بڑا بھائی یونین بینک آف انڈیا میں ملازمت کرتا ہے۔ نوشین نے شہر کے ایک سرکاری اسکول سے سائنس اسٹریم میں انٹرمیڈیٹ کیا۔ وہ شروع سے ہی پڑھائی اور لکھنے میں ٹاپر تھیں۔
نوشین کے والد عبدالقیوم نے کہا کہ نوشین سائنس کی طالبہ ہونے کے علاوہ تاریخ اور مضمون نگاری پر زبردست عبور رکھتی تھیں۔ یہ دیکھ کر انہوں نے اسے حوصلہ دیا اور انجینئرنگ کے بجائے دہلی یونیورسٹی سے تاریخ میں بی اے آنرز پڑھنے بھیج دیا۔ نوشین خالصہ کالج کی طالبہ تھیں اور گریجویشن کے بعد سول سروس کی تیاری شروع کردی تھی۔ اخبارات پڑھنے کے علاوہ نوشین نے دوسرے تعلیمی پلیٹ فارمز کو بھی بہت قریب سے دیکھا۔ نوشین نے کہا کہ انہیں ایک بڑی ذمہ داری ملی ہے۔ معاشرے کے پسماندہ لوگوں کو آگے بڑھانے کی ہر ممکن کوشش رہے گی۔
نوشین کی والدہ نے کہا کہ ان کی بہت سادہ اور ذہین بیٹی نے آج ان کے خاندان اور پورے گورکھپور کو فخر سے بلند کر دیا ہے۔ میں جتنی خوشی محسوس کرتی ہوں اس کا اظہار نہیں کیا جا سکتا۔ صرف 25 سال کی عمر میں انہوں نے ملک کا سب سے بڑا اور باوقار امتحان کامیاب کرکے نہ صرف اپنا بلکہ اہل خانہ اور اپنے قصبہ کا نام روشن کیا۔
