گاندربل ضلع کے کنگن علاقے میں رائل کے گاؤں باٹا پورہ کالاس پتی کی عوام کو نالہ سندھ پر پل نہ ہونے کی وجہ سے شدید مشکلات کا سامنا ہے۔ پاتھری بل، بلتی محلہ اور ٹھیکری محلہ کے عوام نے بتایا کہ وہ ہر روز ایک عارضی لکڑی کے پل سے نالہ سندھ کو عبور کرتے ہوئے قریبی بازار تک پہنچتے ہیں۔
علاقے کے لوگوں کی واحد خواہش بہتر سڑک اور نالہ سندھ پر ایک پل ہے جس سے ان کا ایک بڑا مسئلہ ختم ہو جائے گا اور انہیں آنے جانے میں سہولت حاصل ہو۔
لوگوں کے لیے نالہ سندھ کو عبور کرنا انتہائی مشکل ہو جاتا ہے جو بارش اور سردیوں کے موسم میں پانی سے بھر جاتا ہے۔ انہوں نے کہا کہ ہر سال وہ ندی پر ایک عارضی پل بناتے ہیں لیکن بارش اور سردیوں کے موسم میں بہتا ہوا پانی پل کو بہا دیتا ہے جس سے لوگوں کے پاس نالہ سندھ کو عبور کرنے کا کوئی راستہ نہیں رہتا۔
انہوں نے کہا، "اگر پل ہوتا تو کئی لوگ بچ جاتے،” انہوں نے مزید کہا، "صرف ہم ہی جانتے ہیں کہ جب بھی سردیوں کے موسم میں نالہ سندھ کو عبور کرتے ہیں تو ہم اپنی جان کو کس طرح خطرے میں ڈالتے ہیں۔” انہوں نے ایل جی اور ڈی سی گاندربل سے اس معاملے کو دیکھنے کی اپیل کی۔
