حیدرآباد: حکومت تلنگانہ نے آج جئے پور۔ ممبئی سوپر فاسٹ ایکسپریس ٹرین میں ریلوے پروٹیکشن فورس کے اہلکار کی فائرنگ میں جاں بحق ہونے والے حیدرآبادی شخص سید سیف الدین کے بیوی کو سرکاری نوکری اور ایک ڈبل بیڈروم فلاٹ دینے کا اعلان کیا ہے۔
اْر پی ایف کانسٹبل چیتن کمار نے چلتی ٹرین میں 31جولائی کو صبح کے اوقات میں فائرنگ کی تھی جس میں 4 افراد ہلاک ہوگئے ان میں حیدرآباد کے 48 سالہ سید سیف الدین بھی شامل ہیں۔ سیف الدین حیدرآباد کے بازار گھاٹ علاقہ کے رہنے والے تھے۔ وہ، موبائل شاپ پر کام کرتے تھے۔
Today Spoke On #JaipurExpressTerrorAttack In Telangana Assembly. pic.twitter.com/Z3VWpH3AdL
— Akbaruddin Owaisi (@akbarowaisii) August 4, 2023
ریاستی وزیر کے تارک راما راؤ نے آج اسمبلی میں یہ اعلان کیا کہ حکومت، سید سیف الدین کی بیوہ کو سرکاری نوکری اور ڈبل بیڈ روم کا ایک فلاٹ دے گی۔
کے ٹی آر نے کہا کہ حکومت، بیوہ کو جی ایچ ایم سی یا ایچ ایم ڈی اے یا کیوکیو ایس یو ڈی اے (قلی قطب شاہ ڈیولپمنٹ اتھاریٹی) میں نوکری دے گی۔ انہوں نے کہا کہ وہ کل، اس سلسلہ میں احکام جاری کریں گے۔
تلنگانہ اسمبلی میں آج مجلس کے رہنما اکبر الدین اویسی کی توجہ دہانی پر کے ٹی آر نے سیف الدین کی بیوہ کو نوکری اور ڈبل بیڈروم فلیٹ دینے کا اعلان کیا۔ اکبر الدین اویسی نے حکومت سے سیف الدین کے پسماندگان کو معاوضہ دینے کا مطالبہ کیا جس پر کے ٹی آر نے کہا کہ اس کا فیصلہ چیف منسٹر کے سی آر کریں گے۔
حکمراں پارٹی بی آر ایس کے کارگزار صدر کے ٹی آر نے کہا کہ ان کی پارٹی، سیف الدین کی 3 بیٹیوں کے نام پر 2,2 لاکھ روپے ڈپازٹ کرائے گی۔ انہوں نے مجلس کو مشورہ دیا کہ وہ بھی اس غمزدہ خاندان کی کچھ مالی مدد کریں۔ سید سیف الدین کو تین بیٹیاں ہیں سب سے چھوٹی بیٹی صرف 6 ماہ کی ہے۔ جبکہ دیگر دو بیٹیاں 6 اور4 سال کی ہیں۔
اکبر الدین اویسی نے اسمبلی میں کہا کہ آر پی ایف کانسٹبل نے داڑھی والے تین مسلمانوں کو شہید کردیا، بڑھتی نفرت اور بنیاد پرستی کی وجہ سے یہ ہلاکتیں ہوئی ہیں۔ ہندوؤں اور مسلمانوں میں نفرت کو بڑھاوا دیا جارہا ہے، اقتدار پر فائز افراد نفرت کی آگ پھیلاتے ہوئے ملک کو تباہ کررہے ہیں۔
