واشنگٹن: گلوبل انڈیکس کی جانب سے دنیا میں مقبول ترین ناموں کی فہرست جاری کی گئی ہے جس میں سب سے اوپر اسم محمد ہے۔ دنیا کی ایک چوتھائی سے زائد آبادی مسلمانوں پر مشتمل ہے اور مسلمانوں کی اکثریت اپنے ناموں کے ساتھ خاتم النبین محمد ﷺ کا نام لگاتے ہیں جب کہ یہ نام دنیا کے مقبول ترین ناموں کی فہرست میں شامل ہے۔ دنیا کے مقبول ترین ناموں سے متعلق گلوبل انڈیکس کی جانب سے سال 2023 کی رینکنگ سے متعلق فہرست جاری کی گئی ہے جس میں نام محمد سرفہرست رہا ہے۔
نئی رینکنگ کے مطابق دنیا بھر میں سب سے زیادہ استعمال کیا جانے والا مقبول ترین پہلا نام ’محمد‘ ہے۔گلوبل انڈیکس کے مطابق نام ’محمد‘ دنیا بھر میں تقریباً 13 کروڑ 33 لاکھ 49 ہزار 300 افراد کے ناموں سے پہلے استعمال ہوتا ہے۔
اس عالمی فہرست میں دوسرے نمبر پر جس نام نے جگہ پائی ہے وہ ماریہ ہے جو دنیا کے 6 کروڑ 11 لاکھ 34 ہزار 526 خواتین کا ہے۔ تیسرا نمبر نام ’نوشی‘ مقبول ترین ہے جو 5 کروڑ 58 لاکھ 98 ہزار 624 خواتین سے جڑا ہے۔ اس فہرست میں نام ’احمد‘ چھٹے نمبر پر موجود ہے جو دنیا کے تقریباً ڈیڑھ کروڑ لوگوں کا نام ہے جب کہ آٹھویں نمبر پر ’’علی‘‘ نام رکھنے والے افراد کی تعداد ایک کروڑ 47 لاکھ 63 ہزار 733 ہے۔ فہرست میں 12 ویں نمبر پر موجود نام ’’عبدل‘‘ کے نام سے ایک کروڑ 21 لاکھ 63 ہزار 978 افراد ہیں۔
