ریاست بہار کے دار الحکومت پٹنہ کے پھلواری شریف سے انٹلی جنس بیورو کی اطلاع پر پاپولر فرنٹ آف انڈیا اور سوشل ڈیموکریٹک پارٹی آف انڈیا کے دو اراکین کو مبینہ ملک مخالف سرگرمیوں میں ملوث ہونے کے الزام میں گرفتار کیا گیا ہے۔ ان دونوں کی شناخت اطہر پرویز اور جلال الدین کے طور پر کی گئی ہے۔ محمد جلال الدین جھارکھنڈ پولیس سے ریٹائرڈ سب انسپکٹر ہیں۔ دونوں پاپولر فرنٹ آف انڈیا اور ایس ڈی پی آئی کے سرگرم رکن بتائے جارہے ہیں۔
خفیہ اطلاعات کے مطابق یہ دونوں مبینہ ملک مخالف سرگرمیوں اور وزیر اعظم نریندر مودی کے بہار دورے پر کوئی بڑی واردات انجام دینے کی مبینہ سازش کررہے تھے، جس کے لیے ان کے بینک کھاتے مین بڑی رقم منتقل کی گئی تھی۔
پولیس کے مطابق اطہر پرویز اور جلال الدین مبینہ طور پر شدت پسند تنظیموں سے رابطے میں تھے، این آئی اے کی ٹیم پوچھ گچھ کے لیے پٹنہ پہنچ گئی ہے۔ موصولہ اطلاعات کے مطابق اطہر پرویز اور جلال الدین کو پٹنہ کی ‘بیور جیل’ کے خصوصی سیل میں رکھا گیا ہے۔ پٹنہ پولیس کو ان سے بیرون ملک سے فنڈنگ ملنے کی اطلاع ملی ہے، ان کے پاس سے ایک مرتبہ 14 لاکھ، 30 لاکھ اور 40 لاکھ روپے کے لین دین کے ثبوت بھی ملے ہیں۔ ان تمام پہلوؤں پر تحقیقات کی جا رہی ہے۔
پولیس کے مطابق ‘یہ دونوں مقامی ضلع سطح، ریاستی سطح اور قومی سطح کے PFIs RSDPI کے فعال اراکین کے طور پر اجلاس میں شرکت کرتے تھے اور مبینہ ملک مخالف سرگرمیاں انجام دینے میں ملوث تھے، ان کے پاس سے پی ایف آئی کے دستاویزات، بینر پوسٹر برآمد ہوئے ہیں۔ پولیس نے کہا کہ ملک کے خلاف جرائم کرنا۔ کمیونٹی میں بدامنی، دشمنی، سازش پھیلانے جیسی سنگین دفعات کے تحت مقدمات درج کیا گیا ہے۔
بارہ جولائی کو وزیر اعظم نریندر مودی بہار قانون ساز اسمبلی کی صد سالہ تقریبات کے اختتام پر پٹنہ آئے تھے۔ اطہر پرویز اور جلال الدین کو 11 جولائی کی شام 7:30 بجے پھلواری شریف سے ان کی آمد سے پہلے ہی گرفتار کر لیا گیا تھا۔ قومی تفتیشی ایجنسی (این آئی اے) پٹنہ کے پھلواری شریف پہنچ گئی ہے۔ ٹیم نے درج مقدمے کی تفتیش شروع کر دی ہے۔ اس میں غیر ملکی فنڈنگ سے لے کر دوسرے ممالک کے کردار کی بھی این آئی اے تحقیقات کرے گی۔
پٹنہ کے ایس ایس پی مانوجیت سنگھ ڈھلن نے ایک پریس کانفرنس میں کہا کہ تحقیقات ابھی ابتدائی مرحلے میں ہے، یہ معلوم ہوا ہے کہ ان کی تنظیم کا کام آر ایس ایس کی شاخ جیسا ہے، جیسے آر ایس ایس لاٹھیوں کی جسمانی تربیت دیتے ہیں، اسی طریقے سے یہ لوگ بھی فزیکل ٹریننگ دیتے تھے۔ وہیں بی جے پی نے ایس ایس پی کے بیان کی مخالفت کرتے ہوئے انہیں برخواست کرنے کا مطالبہ کیا ہے۔ ایس ایس پی کو اسی بناء پر وجہ بتاؤ نوٹس جاری کردی گئی ہے۔
