اسرائیلی جیلوں میں الزام کے تحت بغیر کسی جرم اور الزام کے بے شمار فلسطینی افراد قید و بند کی مشکلات سے دوچار ہورہے ہیں۔ ان میں بہت سے افراد ایسے بھی جنہیں ان کا جرم تک معلوم نہیں کہ وہ کس الزام میں قید کیے گئے ہیں۔ انتظامی حراست کے خلاف انسانی حقوق کی تنظیموں نے کئی مرتبہ آواز اٹھائی تاہم یہ بے سود ثابت ہوئی ہے۔
اسرائیلی جیلوں میں بہت سے فلسطینی قیدیوں کی جسمانی اور دماغی صحت کافی متاثر ہیں اور انہیں علاج کی فوری ضرورت ہے تاہم انہیں علاج فراہم نہیں کیا جارہا ہے ان ہی میں سے ایک نوجوان احمد مناصرہ ہے۔ وفا نیوز ایجنسی نے رپورٹ کیا کہ فلسطینی قیدی احمد مناصرہ جمعہ کے روز وسطی اسرائیل میں راملے جیل ہسپتال کے دورے کے دوران صحت کی خرابی کی وجہ سے اپنے وکیل سے بات چیت کرنے میں ناکام رہا۔
دفاعی ٹیم نے کہاکہ "نفسیاتی عملے کے مشورے کے مطابق جو دفاعی عملے کے ساتھ اس کے کیس کی پیروی کر رہا ہے، یہ صورتحال انتہائی تشویشناک ہے، اور احمد کی عمومی نفسیاتی صحت کے لیے سنگین اور حقیقی خطرہ ہے اگر وہ اسی حالت میں رہتا ہے۔
نتیجے کے طور پر دفاعی ٹیم نے اسرائیلی جیل اتھارٹی کو ایک فوری درخواست پیش کی کہ مناصرہ کی نفسیاتی صحت کی خرابی کی وجہ سے اسے فوری طور پر رہا کیا جائے۔ اسرائیل جیل سروس نے 13 جون کو احمد مناصرہ کی دماغی صحت خراب ہونے پر اسے راملے جیل ہسپتال منتقل کر دیا۔
احمد کی توقع تھی کہ وہ بدھ 15 جون کو عدالت میں پیش ہوں گے، لیکن ان کی بگڑتی ہوئی صحت کی وجہ سے سیشن منسوخ کر دیا گیا۔ 18 جون کو انسانی حقوق کی تنظیم ایمنسٹی انٹرنیشنل نے اسرائیلی قابض حکام سے احمد مناصرہ کو فوری رہا کرنے کا مطالبہ کیا۔
ایمنسٹی انٹرنیشنل کے مشرق وسطیٰ اور شمالی افریقہ کے لیے علاقائی ڈائریکٹر ہیبا معرف نے کہا کہ”احمد مناصرہ کو اسرائیلی حکام کی طرف سے طویل ناانصافیوں کا نشانہ بنایا گیا ہے، جس میں اس کی ترقی پر قید کے مضر اثرات اور طویل قید تنہائی بھی شامل ہے۔ اس نے پوچھ گچھ کے دوران ناروا سلوک برداشت کیا، جو اس کے والدین یا وکلاء کی موجودگی کے بغیر کیے گئے تھے، اور اس کو منصفانہ ٹرائل کے حق سے محروم کیا گیا تھا۔ اسے کافی عرصہ پہلے رہا کر دینا چاہیے تھا، اس کے باوجود وہ اسرائیلی جیلوں میں غیر ضروری اذیت میں مبتلا ہے”۔
انہوں نے کہا کہ "نظر بندی سے رہائی کے بعد اسے مناسب طبی نگہداشت تک رسائی دی جانی چاہیے اور اسے دوبارہ کبھی بھی قید تنہائی میں نہیں رکھا جانا چاہیے۔ احمد پر تشدد اور انسانی حقوق کی دیگر خلاف ورزیوں کے الزامات کی موثر اور شفاف تحقیقات ہونی چاہئیں۔
اسرائیلی جیل میں چھ سال تک منظم طریقے سے بدسلوکی کے بعد نوجوان فلسطینی احمد مناصرہ کی فوری رہائی کا مطالبہ کرنے والے کارکنوں کی جانب سے ایک پٹیشن شروع کی گئی ہے۔ یہ پٹیشن گلوبل مینٹل ہیلتھ نیٹ ورک نے شروع کی تھی۔ اس پٹیشن پر اب تک 4 لاکھ سے زائد افراد دستخط کر چکے ہیں۔
9 جون کو قیدی کی والدہ نے ایک پریس کانفرنس کے دوران دنیا سے اپیل کی کہ وہ اپنے بیٹے کے ساتھ ہونے والی ناانصافی کو روکے اور اس بات پر زور دیا کہ ان کے بیٹے کو آزاد کرنے کی ضرورت ہے۔
احمد مناصرہ کے اہل خانہ نے "انسانی حقوق اور بین الاقوامی اداروں سے مداخلت کرنے کا مطالبہ کیا ہے تاکہ وہ اسرائیلی قبضے کی جیلوں میں سخت نفسیاتی اور زندگی گزارنے والے حالات کی روشنی میں اس کی رہائی کے لیے قبضے پر دباؤ ڈالیں۔”
اسرائیلی فورسز نے احمد مناصرہ کو 2015 میں مقبوضہ شہر یروشلم سے مبینہ طور پر چاقو سے حملہ کرنے کی کوشش کے الزام میں گرفتار کیا تھا۔ اس کی عمر 13 سال تھی، اور اس وقت اس کی عمر 20 سال ہے، اسرائیلی فوجیوں نے اسے اور اس کے کزن حسن کو گولی مار دی، جو گرفتاری کے دن ہی شہید ہو گئے تھے۔
میڈیا رپورٹس کے مطابق احمد مناصرہ کو ابتدائی طور پر 12 سال قید کی سزا سنائی گئی تھی۔ اس کے بعد اسے کم کر کے 9 سال کر دیا گیا اور $47,000 سے زیادہ کا جرمانہ کیا گیا جس کو ادا کرنے کے لیے اس کے خاندان نے جدوجہد کی۔
