لکشدیپ کے منی کوئے آئی لینڈ کے تین بی جے پی رہنماؤں نے لکشدیپ بی جے پی صدر عبدالقادر حاجی کو اپنا استعفیٰ پیش کردیا۔ انہوں نے کہا کہ لکشدیپ کے موجودہ حالات میں بی جے پی میں موجود رہنا ان کے لیے ناقابل قبول ہے۔
لکشدیپ بچاؤ تنظیموں کی جانب سے آج پرفل پٹیل کے خلاف یوم سیاہ منایا جارہا ہے۔ پچھلے چند دنوں سے لکشدیپ کے ایڈمنسٹریٹر پرفل پٹیل کے خلاف ان کی جانب سے متعارف کروائے گئے نئے قوانین کے خلاف عوام میں غصہ ہے۔
لکشدیپ کے عوام نئے قوانین کے خلاف احتجاج کررہے ہیں جن میں انسداد مخالف سماجی سرگرمیاں ( غنڈا ایکٹ) لکشدیپ مویشی تحفظ ریگولیشن ایکٹ اور لکشدیپ پنچایت ریگولیشن اور دیگر شامل ہیں۔عوام کا کہنا ہے کہ یہ قوانین جزیرہ کے مفادات کے خلاف ہیں۔
پرفل پٹیل جو سن 2020 میں لکشدیپ کے ایڈمنسٹریٹر مقرر کیے گئے تھے انہیں نئے قوانین متعارف کروانے کے بعد سے حزب اختلاف کی شدید تنقیدوں کا سامنا ہے اس کے علاوہ لکشدیپ اور کیرالہ کے عوام بھی مشتعل ہیں۔
